56 shlokas
नारायणगिरिं ते तु गर्जन्तो राक्षसाम्बुदाः । ववर्षुः शरवर्षेण वर्षेणेवाद्रिमम्बुदाः ।। 7.7.1 ।।
nārāyaṇagiriṃ te tu garjanto rākṣasāmbudāḥ | vavarṣuḥ śaravarṣeṇa varṣeṇevādrimambudāḥ || 7.7.1 ||
Translation
Roaring, those Rakshasas, like rain-clouds, poured down a torrent of arrows upon the mountain that was Narayana, as storm-clouds pour rain upon a mountain.
श्यामावदातस्तैर्विष्णुर्नीलैर्नक्तञ्चरोत्तमैः । वृतो ऽञ्जनगिरीवासीत् वर्षमाणैः पयोधरैः ।। 7.7.2 ।।
śyāmāvadātastairviṣṇurnīlairnaktañcarottamaiḥ | vṛto 'ñjanagirīvāsīt varṣamāṇaiḥ payodharaiḥ || 7.7.2 ||
Translation
Vishnu, dusky-bright of hue, enveloped by those foremost of the night-rangers, dark-blue and raining down their volleys, appeared like the Anjana mountain wrapped about by rain-laden clouds.
शलभा इव केदारं मशका इव पर्वतम् । यथामृतघटं दंशा मकरा इव चार्णवम् ।। 7.7.3 ।।
śalabhā iva kedāraṃ maśakā iva parvatam | yathāmṛtaghaṭaṃ daṃśā makarā iva cārṇavam || 7.7.3 ||
Translation
As locusts assail a field, as gnats assail a mountain, as gadflies assail a pot of nectar, and as crocodiles assail the ocean,
तथा रक्षोधनुर्मुक्ता वज्रानिलमनोजवाः । हरिं विशन्ति स्म शरा लोका इव विपर्यये ।। 7.7.4 ।।
tathā rakṣodhanurmuktā vajrānilamanojavāḥ | hariṃ viśanti sma śarā lokā iva viparyaye || 7.7.4 ||
Translation
so the arrows loosed from the bows of the Rakshasas, swift as the thunderbolt, the wind, and thought, entered into Hari, as the worlds enter into him at the time of universal dissolution.
स्यन्दनैः स्यन्दनगता गजैश्च गजपृष्ठगाः । अश्वारोहास्तथाश्वैश्च पादाताश्चाम्बरे स्थिताः ।। 7.7.5 ।।
syandanaiḥ syandanagatā gajaiśca gajapṛṣṭhagāḥ | aśvārohāstathāśvaiśca pādātāścāmbare sthitāḥ || 7.7.5 ||
Translation
Those mounted in chariots with their chariots, those riding on the backs of elephants with their elephants, the horsemen likewise with their horses, and the foot-soldiers, all stationed in the sky,
राक्षसेन्द्रा गिरिनिभाः शरैः शक्त्यृष्टितोमरैः । निरुछ्वासं हरिं चक्रुः प्राणायामा इव द्विजम् ।। 7.7.6 ।।
rākṣasendrā girinibhāḥ śaraiḥ śaktyṛṣṭitomaraiḥ | niruchvāsaṃ hariṃ cakruḥ prāṇāyāmā iva dvijam || 7.7.6 ||
Translation
the lords of the Rakshasas, huge as mountains, with arrows, spears, swords, and javelins rendered Hari breathless, as the breathing-exercises of pranayama render a twice-born man breathless.
निशाचरैस्ताड्यमानो मीनैरिव महोदधिः । शार्ङ्गमायम्य दुर्धर्षो राक्षसेभ्यो ऽसृजच्छरान् ।। 7.7.7 ।।
niśācaraistāḍyamāno mīnairiva mahodadhiḥ | śārṅgamāyamya durdharṣo rākṣasebhyo 'sṛjaccharān || 7.7.7 ||
Translation
Beaten upon by the night-rangers as the great ocean is beaten by fishes, the invincible one drew the Sharnga bow and let loose his arrows against the Rakshasas.
शरैः पूर्णायतोत्सृष्टैर्वज्रवक्त्रैर्मनोजवैः । चिच्छेद विष्णुर्निशितैः शतशो ऽथ सहस्रशः ।। 7.7.8 ।।
śaraiḥ pūrṇāyatotsṛṣṭairvajravaktrairmanojavaiḥ | ciccheda viṣṇurniśitaiḥ śataśo 'tha sahasraśaḥ || 7.7.8 ||
Translation
With sharp arrows discharged from the bow drawn to its full length, thunderbolt-mouthed and swift as thought, Vishnu cut down the foe by hundreds and by thousands.
विद्राव्य शरवर्षेण वर्षा वायुरिवोत्थितम् । पाञ्चजन्यं महाशङ्खं प्रदध्मौ पुरुषोत्तमः ।। 7.7.9 ।।
vidrāvya śaravarṣeṇa varṣā vāyurivotthitam | pāñcajanyaṃ mahāśaṅkhaṃ pradadhmau puruṣottamaḥ || 7.7.9 ||
Translation
Having scattered them with his rain of arrows, as the wind of the rainy season scatters a risen cloud, the Supreme Person sounded the great conch Panchajanya.
सो ऽम्बुजो हरिणा ध्मातः सर्वप्राणेन शङ्खराट् । ररास भीमनिर्हादस्त्रैलोक्यं व्यथयन्निव ।। 7.7.10 ।।
so 'mbujo hariṇā dhmātaḥ sarvaprāṇena śaṅkharāṭ | rarāsa bhīmanirhādastrailokyaṃ vyathayanniva || 7.7.10 ||
Translation
That king of conches, born of the waters, blown by Hari with all his breath, gave forth a terrible-sounding roar, as if shaking the three worlds.
शङ्खराजरवः सो ऽथ त्रासयामास राक्षसान् । मृगराज इवारण्ये समदानिव कुञ्जरान् ।। 7.7.11 ।।
śaṅkharājaravaḥ so 'tha trāsayāmāsa rākṣasān | mṛgarāja ivāraṇye samadāniva kuñjarān || 7.7.11 ||
Translation
That roar of the king of conches then terrified the Rakshasas, as the lion in the forest terrifies rutting elephants.
न शेकुरश्वाः संस्थातुं विमदाः कुञ्जराभवन् । स्यन्दनेभ्यश्च्युता वीराः शङ्खरावितदुर्बलाः ।। 7.7.12 ।।
na śekuraśvāḥ saṃsthātuṃ vimadāḥ kuñjarābhavan | syandanebhyaścyutā vīrāḥ śaṅkharāvitadurbalāḥ || 7.7.12 ||
Translation
The horses could not keep their footing; the elephants lost their rut; and the heroes, made weak by the blast of the conch, fell from their chariots.
शार्ङ्गचापविनिर्मुक्ता वज्रतुल्याननाः शराः । विदार्य तानि रक्षांसि सुपुङ्खा विविशुः क्षितिम् ।। 7.7.13 ।।
śārṅgacāpavinirmuktā vajratulyānanāḥ śarāḥ | vidārya tāni rakṣāṃsi supuṅkhā viviśuḥ kṣitim || 7.7.13 ||
Translation
The arrows loosed from the Sharnga bow, their points like thunderbolts and well-feathered, having torn through those Rakshasas, sank into the earth.
भिद्यमानाः शरैः सङ्ख्ये नारायणकरच्युतैः । निपेतू राक्षसा भूमौ शैला वज्रहता इव ।। 7.7.14 ।।
bhidyamānāḥ śaraiḥ saṅkhye nārāyaṇakaracyutaiḥ | nipetū rākṣasā bhūmau śailā vajrahatā iva || 7.7.14 ||
Translation
Pierced in battle by the arrows sped from Narayana's hand, the Rakshasas fell to the ground like mountains struck by the thunderbolt.
व्रणानि परगात्रेभ्यो विष्णुचक्रकृतानि वै । असृक्क्षरन्ति धाराभिः स्वर्णधारा इवाचलाः ।। 7.7.15 ।।
vraṇāni paragātrebhyo viṣṇucakrakṛtāni vai | asṛkkṣaranti dhārābhiḥ svarṇadhārā ivācalāḥ || 7.7.15 ||
Translation
From the bodies of the foe, the wounds made by Vishnu's discus streamed forth blood in torrents, as mountains pour down their streams of golden ore.
शङ्खराजरवश्चापि शार्ङ्गचापरस्वस्तथा । राक्षसानां रवांश्चापि ग्रसते वैष्णवो रवः ।। 7.7.16 ।।
śaṅkharājaravaścāpi śārṅgacāparasvastathā | rākṣasānāṃ ravāṃścāpi grasate vaiṣṇavo ravaḥ || 7.7.16 ||
Translation
The roar of the king of conches, and likewise the twang of the Sharnga bow, and also the cries of the Rakshasas, all of these the sound of Vishnu swallowed up.
तेषां शिरोधरान्धूताञ्छरध्वजधनूंषि च । रथान्पताकास्तूणीरांश्चिच्छेद स हरिः शरैः ।। 7.7.17 ।।
teṣāṃ śirodharāndhūtāñcharadhvajadhanūṃṣi ca | rathānpatākāstūṇīrāṃściccheda sa hariḥ śaraiḥ || 7.7.17 ||
Translation
With his arrows that Hari severed their shaken necks together with their arrows, banners, and bows, and their chariots, flags, and quivers.
सूर्यादिव करा घोरा ऊर्मयः सागरादिव । पर्वतादिव नागेन्द्रा धारौघा इव चाम्बुदात् ।। 7.7.18 ।।
sūryādiva karā ghorā ūrmayaḥ sāgarādiva | parvatādiva nāgendrā dhāraughā iva cāmbudāt || 7.7.18 ||
Translation
As terrible rays issue from the sun, as waves from the ocean, as great serpents from a mountain, and as torrents of rain from a cloud,
तथा शार्ङ्गविनिर्मुक्ताः शरा नारायणेरिताः । निर्धावन्तीषवस्तूर्णं शतशोथ सहस्रशः ।। 7.7.19 ।।
tathā śārṅgavinirmuktāḥ śarā nārāyaṇeritāḥ | nirdhāvantīṣavastūrṇaṃ śataśotha sahasraśaḥ || 7.7.19 ||
Translation
so the arrows loosed from the Sharnga bow, discharged by Narayana, those shafts sped swiftly forth by the hundreds and by the thousands.
शरभेण यथा सिंहाः सिंहेन द्विरदा यथा । द्विरदेन यथा व्याघ्रा व्याघ्रेण द्वीपिनो यथा ।। 7.7.20 ।।
śarabheṇa yathā siṃhāḥ siṃhena dviradā yathā | dviradena yathā vyāghrā vyāghreṇa dvīpino yathā || 7.7.20 ||
Translation
As lions flee before a sharabha, and elephants before a lion, as tigers flee before an elephant, and leopards before a tiger,
द्वीपिनेव यथा श्वानः शुना मार्जारका यथा । मार्जारेण यथा सर्पाः सर्पेण च यथा ऽ ऽखवः ।। 7.7.21 ।।
dvīpineva yathā śvānaḥ śunā mārjārakā yathā | mārjāreṇa yathā sarpāḥ sarpeṇa ca yathā ' 'khavaḥ || 7.7.21 ||
Translation
as dogs flee before a leopard, and cats before a dog, as snakes flee before a cat, and mice before a snake,
तथा ते राक्षसाः सर्वे विष्णुना प्रभविष्णुना । द्रवन्ति द्राविताश्चन्ये शायिताश्च महीतले ।। 7.7.22 ।।
tathā te rākṣasāḥ sarve viṣṇunā prabhaviṣṇunā | dravanti drāvitāścanye śāyitāśca mahītale || 7.7.22 ||
Translation
so all those rakshasas fled before Vishnu the all-powerful; some were driven off and routed, while others were laid low upon the ground.
राक्षसानां सहस्राणि निहत्य मधुसूदनः । वारिजं पूरयामास तोयदं सुरराडिव ।। 7.7.23 ।।
rākṣasānāṃ sahasrāṇi nihatya madhusūdanaḥ | vārijaṃ pūrayāmāsa toyadaṃ surarāḍiva || 7.7.23 ||
Translation
Having slain thousands of the rakshasas, the slayer of Madhu filled his conch, as the king of the gods fills a rain-cloud.
नारायणशरत्रस्तं शङ्खनादसुविह्वलम् । ययौ लङ्कामभिमुखं प्रभग्नं राक्षसं बलम् ।। 7.7.24 ।।
nārāyaṇaśaratrastaṃ śaṅkhanādasuvihvalam | yayau laṅkāmabhimukhaṃ prabhagnaṃ rākṣasaṃ balam || 7.7.24 ||
Translation
Terrified by Narayana's arrows and utterly unnerved by the blast of his conch, the shattered rakshasa army fled toward Lanka.
प्रभग्ने राक्षसबले नारायणशराहते । सुमाली शरवर्षेण निववार रणे हरिम् ।। 7.7.25 ।।
prabhagne rākṣasabale nārāyaṇaśarāhate | sumālī śaravarṣeṇa nivavāra raṇe harim || 7.7.25 ||
Translation
When the rakshasa army was broken, stricken by Narayana's arrows, Sumali withstood Hari in the battle with a downpour of arrows.
स तु तं छादयामास नीहार इव भास्करम् । राक्षसाः सत्त्वसम्पन्नाः पुनर्धैर्यं समादधुः ।। 7.7.26 ।।
sa tu taṃ chādayāmāsa nīhāra iva bhāskaram | rākṣasāḥ sattvasampannāḥ punardhairyaṃ samādadhuḥ || 7.7.26 ||
Translation
He covered Hari over as fog covers the sun; and the rakshasas, full of courage, once more steadied their resolve.
अथ सो ऽभ्यपतद्रोषाद्राक्षसो बलदर्पितः । महानादं प्रकुर्वाणो राक्षसाञ्जीवयन्निव ।। 7.7.27 ।।
atha so 'bhyapatadroṣādrākṣaso baladarpitaḥ | mahānādaṃ prakurvāṇo rākṣasāñjīvayanniva || 7.7.27 ||
Translation
Then that rakshasa, proud of his strength, rushed forward in fury, uttering a mighty roar, as if reviving the rakshasas.
उत्क्षिप्य लम्बाभरणं धुन्वन्करमिव द्विपः । ररास राक्षसो हर्षात्सतडित्तोयदो यथा ।। 7.7.28 ।।
utkṣipya lambābharaṇaṃ dhunvankaramiva dvipaḥ | rarāsa rākṣaso harṣātsataḍittoyado yathā || 7.7.28 ||
Translation
Tossing up his swinging ornaments as an elephant tosses its trunk, the rakshasa roared with delight like a thundercloud charged with lightning.
सुमालेर्नर्दतस्तस्य शिरो ज्वलितकुण्डलम् । चिच्छेद यन्तुरश्वाश्च भ्रान्तास्तस्य तु रक्षसः ।। 7.7.29 ।।
sumālernardatastasya śiro jvalitakuṇḍalam | ciccheda yanturaśvāśca bhrāntāstasya tu rakṣasaḥ || 7.7.29 ||
Translation
As Sumali bellowed thus, Hari severed his head with its blazing earrings, and the charioteer and horses of that rakshasa were thrown into confusion.
तैरश्वैर्भ्राम्यते भ्रान्तैः सुमाली राक्षसेश्वरः । इन्द्रियाश्वैः परिभ्रान्तैर्धृतिहीनो यथा नरः ।। 7.7.30 ।।
tairaśvairbhrāmyate bhrāntaiḥ sumālī rākṣaseśvaraḥ | indriyāśvaiḥ paribhrāntairdhṛtihīno yathā naraḥ || 7.7.30 ||
Translation
By those bewildered horses Sumali, the lord of the rakshasas, was dragged about, as a man bereft of self-control is carried away by the bewildered horses of his senses.
ततो विष्णुं महाबाहुं प्रपतन्तं रणाजिरे । हृते सुमालेरश्वैश्च रथे विष्णुरथं प्रति ।। 7.7.31 ।।
tato viṣṇuṃ mahābāhuṃ prapatantaṃ raṇājire | hṛte sumāleraśvaiśca rathe viṣṇurathaṃ prati || 7.7.31 ||
Translation
Then, when Sumali's horses had carried off his chariot, Mali advanced against the mighty-armed Vishnu as he bore down upon the field of battle, making toward Vishnu's chariot.
माली चाभ्यद्रवद्युक्तः प्रगृह्य सशरं धनुः । मालेर्धनुश्च्युता बाणाः कार्तस्वरविभूषिताः । विविशुर्हरिमासाद्य क्रौञ्चं पत्ररथा इव ।। 7.7.32 ।।
mālī cābhyadravadyuktaḥ pragṛhya saśaraṃ dhanuḥ | mālerdhanuścyutā bāṇāḥ kārtasvaravibhūṣitāḥ | viviśurharimāsādya krauñcaṃ patrarathā iva || 7.7.32 ||
Translation
And Mali rushed on, ready, grasping his bow with an arrow fitted to it; the shafts loosed from Mali's bow, adorned with gold, reaching Hari, entered him as winged birds enter the Krauncha mountain.
अर्द्यमानः शरैः सो ऽथ मालिमुक्तैः सहस्रशः । चुक्षुभे न रणे विष्णुर्जितेन्द्रिय इवाधिभिः ।। 7.7.33 ।।
ardyamānaḥ śaraiḥ so 'tha mālimuktaiḥ sahasraśaḥ | cukṣubhe na raṇe viṣṇurjitendriya ivādhibhiḥ || 7.7.33 ||
Translation
Though tormented by the arrows loosed by Mali by the thousand, Vishnu was not shaken in the battle, like one who has conquered his senses and is untroubled by mental afflictions.
अथ मौर्वीस्वनं कृत्वा भगवान्भूतभावनः । मालिनं प्रति बाणौघान्ससर्जारिनिषूदनः ।। 7.7.34 ।।
atha maurvīsvanaṃ kṛtvā bhagavānbhūtabhāvanaḥ | mālinaṃ prati bāṇaughānsasarjāriniṣūdanaḥ || 7.7.34 ||
Translation
Then the Lord, the source of all beings, the destroyer of his foes, having made his bowstring resound, loosed floods of arrows against Mali.
ते मालिदेहमासाद्य वज्रविद्युत्प्रभाः शराः । पिबन्ति रुधिरं तस्य नागा इव सुधारसम् ।। 7.7.35 ।।
te mālidehamāsādya vajravidyutprabhāḥ śarāḥ | pibanti rudhiraṃ tasya nāgā iva sudhārasam || 7.7.35 ||
Translation
Those arrows, gleaming like thunderbolts and lightning, reaching Mali's body, drank his blood as serpents drink the nectar of immortality.
मालिनं विमुखं कृत्वा शङ्खचक्रगदाधरः । मालिमौलिं ध्वजं चापं वाजिनश्चाप्यपातयत् ।। 7.7.36 ।।
mālinaṃ vimukhaṃ kṛtvā śaṅkhacakragadādharaḥ | mālimauliṃ dhvajaṃ cāpaṃ vājinaścāpyapātayat || 7.7.36 ||
Translation
Having turned Mali away in flight, the bearer of conch, discus, and mace struck down Mali's crown, his banner, his bow, and his horses as well.
विरथस्तु गदां गृह्य माली नक्तञ्चरोत्तमः । आपुप्लुवे गदापाणिर्गिर्यग्रादिव केसरी ।। 7.7.37 ।।
virathastu gadāṃ gṛhya mālī naktañcarottamaḥ | āpupluve gadāpāṇirgiryagrādiva kesarī || 7.7.37 ||
Translation
Mali, the foremost of the night-rangers, deprived of his chariot, seized his mace and leapt up, mace in hand, like a lion bounding from a mountain peak.
गदया गरुडेशानमीशानमिव चान्तकः । ललाटदेशे ऽभ्यहनद्वज्रेणेन्द्रो यथा ऽचलम् ।। 7.7.38 ।।
gadayā garuḍeśānamīśānamiva cāntakaḥ | lalāṭadeśe 'bhyahanadvajreṇendro yathā 'calam || 7.7.38 ||
Translation
With his mace he struck the lord who rides Garuda upon the forehead, as Antaka would strike Ishana, or as Indra struck a mountain with his thunderbolt.
गदयाभिहतस्तेन मालिना गरुडो भृशम् । रणात्पराङ्मुखं देवं कृतवान्वेदनातुरः ।। 7.7.39 ।।
gadayābhihatastena mālinā garuḍo bhṛśam | raṇātparāṅmukhaṃ devaṃ kṛtavānvedanāturaḥ || 7.7.39 ||
Translation
Garuda, sorely smitten by Mali with that mace and overcome with pain, caused the god mounted upon him to turn his back upon the battle.
पराङ्मुखे कृते देवे मालिना गरुडेन वै । उदतिष्ठन्महाञ्छब्दो रक्षसामभिनर्दताम् ।। 7.7.40 ।।
parāṅmukhe kṛte deve mālinā garuḍena vai | udatiṣṭhanmahāñchabdo rakṣasāmabhinardatām || 7.7.40 ||
Translation
When the god had been made to turn away by Mali through Garuda, a great roar arose from the rakshasas shouting all together.
रक्षसां रवतां रावं श्रुत्वा हरिहयानुजः ।। 7.7.41 ।।
rakṣasāṃ ravatāṃ rāvaṃ śrutvā harihayānujaḥ || 7.7.41 ||
Translation
And the younger brother of the bay-steeded Indra heard the cry of those roaring rakshasas.
तिर्यगास्थाय सङ्क्रुद्धः पक्षीशे भगवान्हरिः । पराङ्मुखो ऽप्युत्ससर्ज मालेश्चक्रं जिघांसया ।। 7.7.42 ।।
tiryagāsthāya saṅkruddhaḥ pakṣīśe bhagavānhariḥ | parāṅmukho 'pyutsasarja māleścakraṃ jighāṃsayā || 7.7.42 ||
Translation
Greatly enraged, the divine Hari, though turned away upon the lord of birds, set himself sideways and hurled his discus at Mali with intent to slay him.
तत्सूर्यमण्डलाभासं स्वभासा भासयन्नभः । कालचक्रनिभं चक्रं मालेः शीर्षमपातयत् ।। 7.7.43 ।।
tatsūryamaṇḍalābhāsaṃ svabhāsā bhāsayannabhaḥ | kālacakranibhaṃ cakraṃ māleḥ śīrṣamapātayat || 7.7.43 ||
Translation
That discus, blazing like the orb of the sun, illuminating the sky with its own splendor, resembling the wheel of Time, struck off Mali's head.
तच्छिरो राक्षसेन्द्रस्य चक्रोत्कृत्तं बिभीषणम् । पपात रुधिरोद्गारि पुरा राहुशिरो यथा ।। 7.7.44 ।।
tacchiro rākṣasendrasya cakrotkṛttaṃ bibhīṣaṇam | papāta rudhirodgāri purā rāhuśiro yathā || 7.7.44 ||
Translation
That terrible head of the lord of the rakshasas, severed by the discus, fell down spurting blood, as of old the head of Rahu had fallen.
ततः सुरैः संसहृष्टैः सर्वप्राणसमीरितः । सिंहनादरवोन्मुक्तः साधु देवेतिवादिभिः ।। 7.7.45 ।।
tataḥ suraiḥ saṃsahṛṣṭaiḥ sarvaprāṇasamīritaḥ | siṃhanādaravonmuktaḥ sādhu devetivādibhiḥ || 7.7.45 ||
Translation
Then the gods, thrilled with joy, with all the force of their breath let loose a cry like a lion's roar, exclaiming, 'Well done, O god!'
मालिनं निहतं दृष्ट्वा सुमाली माल्यवानपि । सबलौ शोकसन्तप्तौ लङ्कामेव प्रधावितौ ।। 7.7.46 ।।
mālinaṃ nihataṃ dṛṣṭvā sumālī mālyavānapi | sabalau śokasantaptau laṅkāmeva pradhāvitau || 7.7.46 ||
Translation
Seeing Mali slain, Sumali and Malyavan too, burning with grief, fled together with their forces straight to Lanka.
गरुडस्तु समाश्वस्तः सन्निवृत्य यथा पुरा । राक्षसान्द्रावयामास पक्षवातेन कोपितः ।। 7.7.47 ।।
garuḍastu samāśvastaḥ sannivṛtya yathā purā | rākṣasāndrāvayāmāsa pakṣavātena kopitaḥ || 7.7.47 ||
Translation
But Garuda, having recovered, turned back as before, and enraged, drove off the rakshasas with the wind of his wings.
चक्रकृत्तास्यकमला गदासञ्चूर्णितोरसः । लाङ्गलग्लपितग्रीवा मुसलैर्भिन्नमस्तकाः ।। 7.7.48 ।।
cakrakṛttāsyakamalā gadāsañcūrṇitorasaḥ | lāṅgalaglapitagrīvā musalairbhinnamastakāḥ || 7.7.48 ||
Translation
Their lotus-faces severed by the discus, their chests pulverized by the mace, their necks crushed by the plowshare, and their heads split by the pestles—
केचिच्चैवासिना छिन्नास्तथान्ये शरपीडिताः । निपेतुरम्बरात्तूर्णं राक्षसाः सागराम्भसि ।। 7.7.49 ।।
keciccaivāsinā chinnāstathānye śarapīḍitāḥ | nipeturambarāttūrṇaṃ rākṣasāḥ sāgarāmbhasi || 7.7.49 ||
Translation
and others cut down by the sword and tormented by arrows, the rakshasas fell swiftly from the sky into the waters of the ocean.
नारायणो बाणवराशनीभिर्विदारयामास धनुर्विमुक्तैः । नक्तञ्चरान्मुक्तविधूतकेशान्यथा ऽशनीभिः सतडिन्महाभ्राः ।। 7.7.50 ।।
nārāyaṇo bāṇavarāśanībhirvidārayāmāsa dhanurvimuktaiḥ | naktañcarānmuktavidhūtakeśānyathā 'śanībhiḥ sataḍinmahābhrāḥ || 7.7.50 ||
Translation
Narayana, with the finest of arrows like thunderbolts loosed from his bow, tore apart the night-rangers, their hair flung loose and disheveled, as great clouds charged with lightning are rent by the thunderbolts.
भिन्नातपत्रं पतमानमस्त्रं शरैरपध्वस्तविनीतवेषम् । विनिस्सृतान्त्रं भयलोलनेत्रं बलं तदुन्मत्ततरं बभूव ।। 7.7.51 ।।
bhinnātapatraṃ patamānamastraṃ śarairapadhvastavinītaveṣam | vinissṛtāntraṃ bhayalolanetraṃ balaṃ tadunmattataraṃ babhūva || 7.7.51 ||
Translation
Its parasols shattered, its weapons falling, its decorous attire torn away by the arrows, its entrails spilling out, its eyes rolling in terror—that host became utterly maddened.
सिंहार्दितानामिव कुञ्जराणां निशाचराणां सह कुञ्जराणाम् । रवाश्च वेगाश्च समं बभूवुः पुराणसिंहेन विमर्दितानाम् ।। 7.7.52 ।।
siṃhārditānāmiva kuñjarāṇāṃ niśācarāṇāṃ saha kuñjarāṇām | ravāśca vegāśca samaṃ babhūvuḥ purāṇasiṃhena vimarditānām || 7.7.52 ||
Translation
The cries and the rushing of those night-rangers, together with their elephants, were like those of elephants tormented by a lion, as they were crushed by that ancient lion.
ते वार्यमाणा हरिबाणजालैः सबाणजालानि समुत्सृजन्तः । धावन्ति नक्तञ्चरकालमेघा वायुप्रभिन्ना इव कालमेघाः ।। 7.7.53 ।।
te vāryamāṇā haribāṇajālaiḥ sabāṇajālāni samutsṛjantaḥ | dhāvanti naktañcarakālameghā vāyuprabhinnā iva kālameghāḥ || 7.7.53 ||
Translation
Held back by the nets of Hari's arrows, yet hurling forth their own showers of arrows, those night-rangers, dark as the clouds of doom, fled like death-dark clouds scattered by the wind.
चक्रपहारैर्विनिकृत्तशीर्षाः सञ्चूर्णिताङ्गाश्च गदाप्रहारैः । अभिप्रहारैर्द्विविधा विभिन्नाः पतन्ति शैला इव राक्षसेन्द्राः ।। 7.7.54 ।।
cakrapahārairvinikṛttaśīrṣāḥ sañcūrṇitāṅgāśca gadāprahāraiḥ | abhiprahārairdvividhā vibhinnāḥ patanti śailā iva rākṣasendrāḥ || 7.7.54 ||
Translation
Their heads severed by blows of the discus, their bodies crushed to powder by strokes of the mace, split asunder in these two ways by the assaults, the lords of the rakshasas fell like mountains.
विलम्बमानैर्मणिहारकुण्डलैर्निशाचरैर्नीलबलाहकोपमैः । निपात्यमानैर्ददृशे निरन्तरं निपात्यमानैरिव नीलपर्वतैः ।। 7.7.55 ।।
vilambamānairmaṇihārakuṇḍalairniśācarairnīlabalāhakopamaiḥ | nipātyamānairdadṛśe nirantaraṃ nipātyamānairiva nīlaparvataiḥ || 7.7.55 ||
Translation
With their jeweled necklaces and earrings dangling, the night-rangers, resembling dark rain-clouds, were seen falling without cease, as though dark mountains were being hurled down one after another.
इत्यार्षे श्रीमद्रामायणे वाल्मीकीये आदिकाव्ये श्रीमदुत्तरकाण्डे सप्तमः सर्गः ।। 7 ।।
ityārṣe śrīmadrāmāyaṇe vālmīkīye ādikāvye śrīmaduttarakāṇḍe saptamaḥ sargaḥ || 7 ||
Translation
Thus in the sacred Shrimad Ramayana of Valmiki, the first epic poem, in the venerable Uttara Kanda, ends the seventh sarga.